Niwo mukino urebwa kandi ugakundwa na benshi, Sobanukirwa amateka ya Tour du Rwanda

Tour du Rwanda ni isiganwa mpuzamahanga ry’amagare rizenguruka u Rwanda, rikaba rifite amateka akomeye kuva ryatangira kugeza uyu munsi.

Amateka ya Tour du Rwanda

Tour du Rwanda yatangiye mu mwaka wa 1988 nk’isiganwa ry’igihugu, igamije guteza imbere umukino w’amagare mu Rwanda. Mu 2009, ryabaye isiganwa mpuzamahanga ryemewe na Union Cycliste Internationale (UCI), rishyirwa ku rwego rwa 2.2. Iri siganwa ryakomeje gutera imbere, ndetse mu 2019 ryazamuwe ku cyiciro cya 2.1, bituma riba rimwe mu masiganwa akomeye muri Afurika, rihuza amakipe akomeye yo ku migabane itandukanye.

Tour du Rwanda 2025

Tour du Rwanda 2025 izaba kuva ku itariki ya 23 Gashyantare kugeza ku ya 2 Werurwe 2025. Iri siganwa rizitabirwa n’amakipe 16, arimo Israel-Premier Tech yo muri Israel na TotalEnergies yo mu Bufaransa. Andi makipe ni Soudal Quick-Step Dev Team (U Bubiligi), Lotto–Dstny (U Bubiligi), Team Amani (Rwanda), Bike Aid (U Budage), Development Team DSM–Firmenich PostNL (u Buholandi), Java Inovotec (Rwanda), May Stars (Rwanda), na UAE (United Arab Emirates). Amakipe y’ibihugu azitabira ni u Rwanda, Angola, Afurika y’Epfo, Eritrea, Ethiopia, ndetse na UCI Centre Mondial du Cyclisme igizwe n’abakinnyi baturuka mu bihugu bitandukanye bya Afurika.

Inzira za Tour du Rwanda 2025

Tour du Rwanda 2025 izaba igizwe n’uduce umunani:

1. Agace ka mbere (23 Gashyantare 2025): Gusiganwa n’ibihe ku giti cy’umukinnyi (Individual Time Trial) kuva kuri Stade Amahoro kugera kuri Stade Amahoro, ku ntera y’ibilometero 4.
2. Agace ka kabiri (24 Gashyantare 2025): Rukomo (Gicumbi) – Kayonza, ibilometero 158.
3. Agace ka gatatu (25 Gashyantare 2025): Kigali – Musanze, ibilometero 121.
4. Agace ka kane (26 Gashyantare 2025): Musanze – Rubavu, ibilometero 102.
5. Agace ka gatanu (27 Gashyantare 2025): Rubavu – Karongi, ibilometero 97.
6. Agace ka gatandatu (28 Gashyantare 2025): Rusizi – Huye, ibilometero 143.
7. Agace ka karindwi (1 Werurwe 2025): Nyanza – Canal Olympia (Kigali), ibilometero 114.
8. Agace ka munani (2 Werurwe 2025): Kigali Convention Centre – Kigali Convention Centre, ibilometero 73.

Iri siganwa rizanyura mu bice bitandukanye by’igihugu, harimo n’uturere twegereye imipaka y’u Rwanda na Repubulika Iharanira Demokarasi ya Congo nka Rubavu na Rusizi. Nubwo hari ikibazo cy’umutekano muke mu burasirazuba bwa Congo, ubuyobozi bwa Tour du Rwanda bwatangaje ko iri siganwa rizaba nta nkomyi, kuko u Rwanda rwafashe ingamba zihamye zo kubungabunga umutekano w’abakinnyi n’abafana.

Iterambere rya Tour du Rwanda

Mu myaka ishize, Tour du Rwanda yakomeje gutera imbere haba mu rwego rw’imitegurire ndetse n’ubwitabire bw’amakipe akomeye ku isi. Iri siganwa ryabaye urubuga rwiza rwo kugaragaza impano z’abakinnyi b’imbere mu gihugu no ku rwego mpuzamahanga, ndetse rinagira uruhare mu guteza imbere ubukerarugendo bw’u Rwanda. Biteganyijwe ko mu mwaka wa 2025, u Rwanda ruzakira Shampiyona y’Isi y’amagare, bikaba ari indi ntambwe ikomeye mu mateka y’umukino w’amagare mu gihugu.

Tour du Rwanda ni isiganwa rifite amateka akomeye kandi rikomeje kuba ikimenyetso cy’iterambere ry’umukino w’amagare mu Rwanda no ku rwego mpuzamahanga.